Gəlin yaltaqlığı həyat kredosuna çevirməyən indiki Azərbaycan sənətkarlarını saymağa çalışaq: bir, iki, üç Tezliklə nitqimiz qırılacaq, gözlərimiz naməlum bir nöqtəyə ilişib-qalacaq, boğazımız quruyacaq
   Nədən ki, həqiqət aşiqi olan sənətkarları sevmirik, qorumuruq. Hələ hardasa əl-ələ verib onların mənəvi soyqırımına imza da atırıq, göz yumuruq, susuruq.
   Bu TƏKlərin TƏK yolu var: ya ölkəni tərk etmək, ya da sınmaq
   Bu günlərdə 56 yaşını qeyd edən, əlahiddə təqdimata ehtiyacı olmayan Cavanşir Quliyev Azərbaycanı tərk etmək yolunu seçdi.
   Hazırda uzaq Kiprdə yaşayıb-çalışan Cavanşir bəyi arayıb-tapdıq, bir könül söhbəti yapdıq. Bu söhbəti siz də dinləyin
   Ta dinləyib, düşünün demirik. Zatən bəlli
   
   Bəstəkarlar İttifaqının sədri Cavanşir Quliyev olsa
   
   Bəstəkarlar İttifaqı indiki strukturda nə Azərbaycan xalqına, nə də İttifaqın üzvlərinə gərək deyil. Bu orqan yalnız onun rəhbərinin problemlərini həll etmək üçün fəaliyyət göstərir. Qurultaydan və kimin sədr olacağından öncə, fikrimcə, İttifaqın sovet dönəmindən qalma strukturunun müasir həyata və dünya musiqi reallıqlarına uyğunlaşdırılmasının yolları axtarılmalıdır. Ondan sonra bu strukturu kimin çalışdıra biləcəyi məsələsi gündəmə gələ bilər. Sualınızın konkret cavabına gəldikdə isə, necə qəbul olunacağından asılı olmayaraq, düşündüyümü və gəldiyim dəqiq nəticəni deyirəm. Azərbaycan Bəstəkarlar İttifaqının Azərbaycan xalqına xidmət etməsini, bunun üçün isə bəstəkarların və musiqişünasların güzəranının yaxşılaşdırılmasının nəticəsi olaraq, musiqimizin yenidən parlamasını, dünyada nüfuzunun artmasını, ədalət prinsipinin bərqərar olmasını, musiqi məkanımızın təmizlənməsini planlı şəkildə bir nəfər təşkil edə bilər və bunun üçün onun yeni struktur və yeni nizamnamə layihəsi var. İstənilən vaxt bu layihəni həmkarları ilə bölüşə bilən adam - Cavanşir Quliyevdir.
   
   Azərbaycan musiqisi ağ günə çıxa bilər
   
   Plan həyata keçsə, ölkədəki bütün musiqi yaradıcılığı və ifaçılığı ilə məşğul olanlar, musiqi növləri (əyləncəli musiqidən akademik musiqiyə qədər) bu və ya digər şəkildə İttifaqın himayəsi altına keçəcəklər, bütün tele-radio kanalları İttifaqın tövsiyələrinə qulaq vermək məcburiyyətində qalacaqlar, bəstəkar peşəsinin nüfuzu bərpa olunacaq, musiqişünaslara görünməmiş tənqid imkanları yaranacaq, Azərbaycanda bəstəkarlıq sənətinin müxtəlif növləri ilə bağlı çox sayda beynəlxalq festivallar keçiriləcək (İttifaqın bərpa olunacaq musiqi təbliğatı bürosu tərəfindən), bəstəkarlar sifariş üstə sifariş alacaqlar (Musiqi Fondu tərəfindən), İttifaqın nəzdində yaradılacaq musiqi nəşriyyatı musiqini və musiqi elmini canlandıracaq - bir sözlə, musiqi həyatı qaynayacaq.
   
   Mütləq çoxluğamı oxşamaq lazımdır?
   
   Amma... Yuxarıda adıçəkilən adamın İttifaqa sədr olması indiki Azərbaycanda kifayət qədər problematikdir. Çünki adam çox müstəqildir, Üzeyir bəyi çox sevir, İttifaq üzvlərinin hamısı ilə sabit münasibətləri var, həmişə düşündüyünü deyir, fikrini adamların üzünə söyləyir, pərdəarxası sövdələşmələri sevmir, ruşvət almaz, ruşvət verməz, alıb-verənləri də dünyanın ən alçaq cinayətkarı hesab edir. Bir sözlə, çağdaş Azərbaycan məmuru formatına uyğun gəlmir. Nəzərə alsaq ki, Bəstəkarlar İttifaqının sədri olacaq şəxs seçkiylə müəyyənləşir adamın yuxarıda sadaladığı keyfiyyətlər bəlkə bəzi İttifaq üzvlərinin də xoşuna gəlməz. Təəssüf ki, insanların hamısı cəsarətli deyil. Bu səbəbdən adamın seçilmə imkanları, bütün cazibəli təkliflərinə baxmayaraq, zənnimcə, bir o qədər yüksək deyil. Bir sözlə, hakimiyyətin gizli və güclü təzyiq vasitələrinə düşünürəm, heç ehtiyac qalmayacaq. Son illər insanlar o qədər qorxaqlaşıblar ki, yuxarıda adıçəkilən şəxsin seçilmə imkanları türklər demişkən, çox düşükdür!
   Mənə elə gəlir ki, hakimiyyət ağrımayan başına dəsmal bağlamaq istəmədiyi üçün İttifaq olduğu kimi - köhnə sovet quruluşunda qalacaq. Sədr vəzifəsinə isə son illər hakimiyyət tərəfindən mükafatlandırılanlardan biri gizli təzyiq və seçki saxtakarlığı vasitəsilə seçdiriləcək. Bu kim ola bilər? X.Mirzəzadə? A.Məlikov? A.Əlizadə? R.Zöhrabov? F.Əlizadə? A.Rzayev? O.Zülfuqarov? M.Mirzəyev? R.Mustafayev? M.Maqomayev? P.Bülbüloğlu? R.Mirişli? O.Kazımov? O.Rəcəbov? A.Dadaşov? E.Rüstəmov? Bunu zaman göstərəcək. Gənclər arasından da sədr "seçilmək" imkanı olanlar var. Məsələn, S.Fərəcov, Allahverdiyev qardaşları, Mirişli qardaşları. Adları çəkilənlərin hamısına dərin hörmətim var, hər hansı biri təyin olunsa, İttifaq indikindən pis olmayacaq.
   
   Hər şeyə rəğmən bəstəkarlarımız yenə möhtəşəmdir
   
   Təkrar olmasın, mənim belə bir fikrim var: Üzeyir bəy musiqimizin bünövrəsini elə möhkəm qoyub ki, bundan sonra heç nə etməsək belə, hələ 100 il də qalacaq. İndi də bu fikirdəyəm. Azərbaycan bəstəkarları hər cür həyati problemlərə rəğmən yenə də kifayət qədər yüksək keyfiyyətli əsərlər yaradırlar. Buna dünyanın bir cox ölkəsində bəstəkarlarımızın ifa olunan əsərlərini, alınan sifarişləri, gələn dəvətləri, festivallardakı çıxışları göstərmək olar. "Musiqimizin bünövrəsi" dedikdə mən bəstəkarlıq peşəsini nəzərdə tuturam, çünki musiqidə hər şeyin başı - bəstəkardır! Qalan musiqi təsərrüfatı, təəssüf ki, bəstəkarların əlində deyil, onun üçün də məsuliyyət bizim üzərimizə düşmür. Üzeyir bəy haqqında dediyim bu fikirdə son illər daha da möhkəmlənmişəm. Azərbaycan bəstəkarlıq sənəti hazırda heç bir ölkənin bəstəkarlıq sənətindən geridə deyil. Xaricə gedən bəstəkarlar bunu çox yaxşı bilir.