2010-cu il, 22-26 yanvar tarixində Muzey Mərkəzinin Sərgi Qalereyasında Azərbaycanın qadın fotoqraflarının yaradıcılığının təbliğinə həsr olunmuş fotosərgi keçirildi. Sərgidə 14 uğurlu müasir foto ustasının 100-dən artıq əsəri nümayiş etdirildi.
   Bir vaxtlar fotoqrafiya incəsənət növü kimi nəinki qəbul olunmurdu, hətta qadınları fotoqraf ustaları kimi qəbul etməkdən ümumiyyətlə, imtina edirdilər. Lakin dünya tənqidçiləri və sənətşünaslar 21-ci əsri video-instalyasiya və fotoqrafiya əsri adlandırdılar. Bu gün bütün dünyada olduğu kimi, Azərbaycanda da qadınların sosial və siyasi fəallığının artması müşahidə olunmaqdadır. Son 10 il ərzində ölkəmizdə qadın fotorəssamlar ordusunun meydana gəlməsi də bu fəallığın bariz nümunəsi kimi çıxış edir.
   “Azərbaycan qadını” jurnalı ilə oxşar ada malik foto-vernisaj, peyzajdan tutmuş, portretə qədər janr müxtəlifliyinin bütün diapazonlarını əhatə edən əsərlərlə diqqət çəkirdi. Ekspozisiyanın özəlliyi onda idi ki, süjetlərin qəhrəmanları da, əsərlərin müəllifləri də qadınlar idi. Fotosərgi fotomaterialın təqdimində özünəməxsus eksklüziv baxış və yanaşma tərzini əks etdirir.
   Qadın fotoqraflarımızın təqdim olunan əsərlərində incə bədii duyum, xəyal gücü və foto ilə şəkil çəkməyin başlıca prinsipləri arasında dərin vəhdət kifayət qədər aydın ifadəsini tapırdı.

   Yeganə C.