Media Mərkəzində “Şəffaflığın artırılması və Korrupsiyaya qarşı mübarizə üzrə Milli Strategiyanın həyata keçirilməsi üzrə Fəaliyyət Planının Alternativ Monitorinqi” layihəsi çərçivəsində layihə tərəfdaşları hesabatı açıqlayıblar.
   
   Layihəni həyata keçirən QHT koalisiyasının məqsədi Azərbaycanda korrupsiyanın səviyyəsini, dövlətin bu sahədə həyata keçirilməsini nəzərdə tutduğu tədbirlərin korrupsiyanın azalmasına təsirini araşdırmaq və korrupsiyanın aradan qaldırılması ilə bağlı təkliflər paketi hazırlamaqdır. Layihə icraçıları bu layihəni korrupsiyaya qarşı milli strategiyanın icrasında vətəndaş cəmiyyəti institutlarının rolunun artırılması müddəasına istinadən icra etdiklərini bildirirlər. Onların fikrincə, alternativ monitorinqlə bağlı hesabat strategiyanın icrasının monitorinq sisteminin yaradılmasına dəstək olacaq.
   Hesabatda qeyd edilir ki, ölkənin korrupsiya ilə mübarizədə müəyyən uğurlar qazanmasına baxmayaraq, korrupsiya Azərbaycanda biznes fəaliyyəti üçün əsas maneə olaraq qalmaqdadır. Müəlliflər korrupsiyaya qarşı mübarizə aparmalı olan rəsmi qurumların tədbirlər planının hazırlanıb komissiyaya təqdim etməsinə, korrupsiyanın səviyyəsinə dair hesabatların hazırlanmasına ciddi yanaşmırlar, tədbirlər planı açıq informasiya olduğu halda, komissiyanın internet səhifəsində yerləşdirilmir və bu səbəb üzündən də bütünlükdə korrupsiyaya qarşı dövlət tərəfindən hansı tədbirlərin həyata keçirildiyi məlum olmur.
   Daha sonra hesabatda korrupsiyaya qarşı mübarizənin səmərəli olması üçün komissiyanın səlahiyyətlərini artırmaq, uyğun qanunvericiliyə məsuliyyət və cəza nəzərdə tutan müddəalar daxil etmək, fəaliyyət planının icrası ilə bağlı müəyyən qurum və şəxslərin üzərinə məsuliyyət qoymaq, dövlət qurumlarının korrupsiya ilə bağlı məlumatları internet səhifəsində yerləşdirməsi kimi tövsiyələr yer alıb.
   Adıçəkilən layihə ABŞ Beynəlxalq İnkişaf Agentliyi tərəfindən maliyyələşdirilib, layihə Vətəndaşların Əmək Hüquqlarını Müdafiə Liqası, Avropa Hüquqşünaslar Assosiasiyası, Azərbaycan Gənc Hüquqşünaslar Birliyi, Azərbaycan Hüquqşünaslar Konfederasiyası tərəfindən həyata keçirilib.
   
   TURAN